O principal obxectivo do proxecto é poñer en valor o coñecemento do Mar de Fene así como a actividade cultural, deportiva, gastronómica e de lecer que rexistra o concello entre os turistas e visitantes.
A vida do Mar de Fene normalmente non é visualizada polos viaxeiros que chegan ao concello, polo que pretendemos realizar accións dirixidas a valorizar a historia, a cultura e tradicións baseadas nos seus produtos, oficios, lugares de interese e a actividade social que as xentes de Fene e as súas entidades teñen arredor do mar.
Crearemos unha rede de prescritores que poña en valor todo o relacionado co mundo do Mar de Fene, no que son centrais o sector pesqueiro, o tecido asociativo e o sector hostaleiro, coa finalidade de establecer relacións e desenvolver accións de formación dos actores principais e de divulgación dos nosos produtos o máis preto posible do punto de produción.
Como continuación das dúas edicións anteriores, nas que se concluíu a importancia que o turismo ten para valorizar e comercializar os nosos produtos, o Concello pon en marcha o programa ‘Fene Mar Vivo Plus’ proxecto que se desenvolve ao abeiro do Programa FEMP 2014-2020 da Consellería do Mar, tramitado no GALP Golfo Ártabro Norte na convocatoria 2020.
Un proxecto do Concello de Fene e da Confraría de Barallobre.